Абай облысында алтын қазушылардың кесірінен бір үйір жылқы қырылып қалды

Абай облысында бір үйір жылқы өзен өткелдеріндегі қазылған аймақтан шыға алмай қырылып қалды. Тұрғындар бұған алтын қазушыларды кінәлап отыр, деп хабарлайды Uaqyt.info.

Бұл туралы Massaget.kz жазды.

Абай өңірінде заңсыз жер қазып алтын іздеушілердің кесірінен тұтас бір табын жылқы қырылып қалған. Олардың өткелді тереңдеткені сонша, қойшылар жайлауға айдаған үйір жылқылар батып кеткен. Жергілікті шаруалар шарасыз. Олардың айтуынша, жер қазушылардың кесірінен мұндай оқиғалар жиілеп кеткен.

"Біздің қыстауымыз Жарма ауданында. Ал жазғы жайлауымыз Көкпекті өңірінде. 21 жыл бойы жылқыларды бір жолмен айдап келеміз. Бірақ алтын қазушылардың Қойтас ауылы маңындағы өзен жағасын ауыр техникамен қазып алғаны сонша, үлкен жыралар пайда болған. Оларға өзеннен өтпек болған аттар кептеліп қалған. Осылайша 57 жылқы суға батып кетті", – деді “Тайлақ” шаруашылық басшысы Олжас Ерсінов.

Жергілікті тұрғындар бұл мәселе бойынша шенеуніктерге бірнеше рет шағымданған. Олар аудан әкімдігіне өзен бойындағы сайларды жауып, жағасын қалыпқа келтіруді сұраған. Бірақ шұңқырлар одан да үлкейе бастаған екен. Енді жылқылар өлген жерге экология департаменті, полиция, прокуратура өкілдері бара жатыр. Олар тексеріп, нәтижесі кейінірек жарияланатынын жеткізді.