Әділдік тек аштықпен келе ме? Арыстанбек Мұхамедиұлы сотты қорқытуға кірісті

Елордада сегіз жылға бас бостандығынан айырылған экс-шенеунік Арыстанбек Мұхамедиұлы тағы бір қылмыстық бап бойынша сот залында жауап беруде, деп хабарлайды Uaqyt.info.

Бұл туралы КТК телеарнасы жазды. Ондағы дерекке сүйенсек, әр сот отырысында небір шоу жасаудан жалықпайтын бұрынғы мәдениет министрі бұл жиналғандарды «аштық жариялаймын» деп қорқытқан.

"Егер менің құқыма шек келтірсе, ресми түрде аштық жариялаймын. Олар не қаласа, оны қаласын", - деді Арыстанбек Мұхамедиұлы.

Дегенмен сот отырысының басталуынан аяқталуы тез болған. Мұхамедиұлының мүддесін қорғауға келген екі заңгердің бірі іспен толық таныспапты. Жаңа адвокат судьядан отырысты кейінгі шегеруді сұрап, оның өтініші қанағаттандырылды.

Бір жылдан аса уақыт тергелген Арыстанбек Мұхамедиұлына сот өткен айда үкім шығарған. Судья экс-министрді сегіз жылға бас бостандығынан айырды. Артынша, өткен айдың аяғында оған «Дипломат» қонақ үйін рейдерлік жолмен тартып алды деген қосымша айып тағылды. Куәгерлер экс-шенеуніктің жаға ұстатарлық небір қулық-сұмдығын жайып салғанымен, Мұхамедиұлының өзі «жала жауып отыр» деген сөзінен танар емес.