Алматы облысында 26 жастағы шетел азаматын өлтіріп кеткен
![](https://uaqyt.info/storage/images/C8V0jxdoFETSTEQyIs1dacFVoTHAS8WjbZU0i3A9.jpg)
Алматы облысында шетел азаматының өлі денесі табылды. Дерек кісі өлтіру бабымен тіркелген, деп хабарлайды Uaqyt.info.
Polisia.kz дерегіне сүйенсек, 14 тамызда Еңбекшіқазақ ауданы ПБ-ға Қайназар ауылдық округінің аумағындағы ҮАК су арнасынан ер адамның мәйіті табылғаны туралы хабарлама келіп түскен.
"Аталған дерек ҚР ҚК-нің 99-бабының 1-бөлігі (Кісі өлтіру) бойынша полицияда тіркеліп, сотқа дейінгі тергеу амалдары басталды. Тергеу іс-шарасы кезінде қаза тапқан адамның жеке басы анықталды, ол Өзбекстан Республикасының 26 жастағы тумасы болып шықты. Жедел-іздестіру іс-шаралары барысында полиция қызметкерлері 1984 жылғы күдіктіні анықтап, ұстады. Ол жауап алу кезінде өз кінәсін толық мойындады", – деді Алматы облысы ПД бастығы Бауыржан Әленов.
Қазіргі уақытта сот-медициналық сараптама тағайындаумен барлық қажетті тергеу шаралары жүргізіліп жатыр. Ұсталған адам заңнамада белгіленген тәртіппен қамауға алынды. Тергеу мүддесі үшін өзге ақпарат жария етуге жатпайды.