Әр әйел өз денсаулығы үшін ең алдымен өзі жауапты болуы керек

Астанада әйелдер денсаулығына қатысты ашық талқылау өтті. Kazakhstan Women’s Health жобасы аясында өткен жиынға қоғам қайраткерлері, депутаттар, медиа тұлғалар, журналист және медиаменеджерлер қатысты, деп хабарлайды Uaqyt.info.

Ұйымдастырушылардың айтуынша, жиынның басты мақсаты – кең таралған гинекологиялық аурулар, жыныстық жолмен берілетін инфекциялар, заманауи контрацепция әдістері және жасөспірімдердің жыныстық тәрбиесінің маңыздылығын ашық талқылау.

Медицина ғылымдарының докторы Айнұр Төлетованың айтуынша, зерттеуге қатысқан респонденттердің 73%-ы жедел контрацепцияның бар екендігін біледі екен.

Яғни, 43%-ы жедел контрацепция бедеулікке әкелуі мүмкін деп есептесе, 55%-ы оны түсік жасатумен теңестіреді. Айнұр Төлетова бұл кең тараған қате пікірлерді жоққа шығарды.

"Жедел контрацепция препараттары ұрпақ өрбіту қабілетіне әсер етпейді. Олардың әсер ету механизмі уақытша және репродуктивті жүйеге зиян келтірмейді. Бұл - ғылыми дәлелденген факт. Препараттар овуляцияны немесе ұрықтануды болдырмайды, бірақ жүкті болған жағдайды үзбейді. Контрацепция – бұл денсаулыққа қауіп емес, керісінше, күрделі жағдайлардың алдын алу мүмкіндігі", - деді Айнұр Төлетова.

Ал "Гедеон Рихтер Қазақстан" компаниясының өкілі Динара Бірмағанбетова осындай іс-шаралардың маңыздылығын атап өтті.

"Әйелдер денсаулығы тақырыбының ашық талқылана бастағанына қуаныштымыз. Әйелдер сенімді ақпаратқа қол жеткізіп, денсаулығына қатысты шешімдерді уақытылы қабылдай алуы өте маңызды", - деді Динара Бірмағанбетова.

Бұдан бөлек жиын барысында «Maryam» қорының негізін қалаушы Ләйлә Сұлтанқызы және «Жақсылық клубы» қайырымдылық қозғалысының негізін қалаушы Гүлмира Абдрашева түрлі қиын жағдайларға тап болған әйелдерге көмек көрсету тәжірибесімен бөлісті.

Сонымен қатар, кездесу барысында Ләйлә Сұлтанқызы, Гүлмира Абдрашева, Айнұр Төлетова және ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның мүшесі Назым Жанғазинова Kazakhstan Women’s Health жобасының амбассадорлары болып тағайындалды.