Бір адамның өмірін қиған "Ақкенттегі" өртке кім кінәлі: Заңгер жауап берді

Алматыдағы "Ақкент" тұрғын үй кешеніндегі өрт әп-сәтте халықтың үрейін ұшырды. Тіпті салдарынан бір адам оттан қашамын деп жерге секіріп, көз жұмған болатын. Елдегі белгілі заңгер Думан Көпбаев төтенше жағдайға кімнің жауапты болатынын түсіндірді, деп хабарлайды Uaqyt.info.

Көп қабатты тұрғын үй кешеніндегі өрт жедел сатыдағы электр тоғының дұрыс тоғыспауы салдарынан тұтанды деп айтылуда. Осы орайда Uaqyt.info тілшілері апатқа кімдердің жауапты болатынын белгілі заңгер Думан Көпбаевтан сұрап көрді. Сөзінше тұрғын үй қолданысқа берілгеннен кейін әрі қарайғы барлық күтіміне пәтер иелері кооперативі қарайды.

"Бұл жерде пәтер иелері кооперативі жауап береді. Лифтідегі электр сымынан өрт шықты деп жатыр ғой. Ал құрылыс компаниясы дұрыс салды ма, дұрыс салмады ма, оны КСК мен компания өздері шешеді. Тұрғындар бұл мәселе бойынша талап арыз қалдырғысы келсе міндетті түрде ол мәселеге КСК жауап береді. Себебі сол тұрғын үй кешенінің күтіміне жауапты пәтер иелері кооперативі ғой", - дейді заңгер.

Айта кетейік, бұған дейін "Ақкент" тұрғын үй кешенінде өрт шығып, 300 адам эвакуацияланды. 70 тұрғын зардап шекті. Тіпті төтеншеліктер келгенше оттан қашып құтыламын деген оймен терезеден секірген келіншек көз жұмған болатын.