Дәулеттері еселене түскен: Қазақстандағы ең бай 50 адамның тізімі жарияланды

Елдегі ең бай 50 азаматтың тізімі шықты. Биыл олардың дәулеттері еселене түскен. Ең қызығы миллиардерлер мен миллионерлер қатары 2023 жылы тек бір ғана адаммен жаңарыпты. Қалған 49-ы бұған дейін көштен қалмай жүрген жылдағы бай-бағландар, деп хабарлайды Uaqyt.info.

Елдегі ең бай деген 50 адамның тізімін Forbes.kz жариялады. Дерекке сүйенсек, биыл қалталылардың жиғаны еселене түскен. Жалпы олардың бүкіл жиған-тергені 23,9 миллиард долларды құраған.

Сонымен тізім алғашқы бестігінде 4,6 миллиард долларымен кәсіпкер Владимир Ким көш бастаған. Ол бүкіләлемдегі байлардың да қатарында. Мұнан кейін Тимур Құлыбаев пен Динара Құлыбаева. Байлықтары 4,3 миллиард долларға бағаланған. Төртінші орында Вячеслав Ким 3,6 миллиард доллары бар. Ал бестікті 50 адамның ішіндегі ең жас миллиардер саналған Тимур Тұрлов қорытындылапты. Оның ақшасы 3,1 миллиард доллар.

Болат Өтемұратов 2,7 миллиард доллар ақшасымен 6-шы орында. Ал BI Group басшысы Айдын Рахымбаев 620 миллион долларымен 12-ші орынға жайғасыпты.

Тұңғыш президенттің үлкен қызы Дариға Назарбаева 590 миллион долларымен 14-ші орында. Ал Дариға Назарбаеваның ұлы Нұрәлі Әлиев 249 миллион доллар қаржысымен тізімде 29-шы тұр.

Байлардың қатарында Болат Назарбаевтың үлкен ұлы Нұрбол Назарбаев та бар. Оның байлығы 155 миллион доллар. Тізімде 45-ші.

Толық 50 адамның тізімін мына сілтемеден көре аласыз.