“Еңбегіңізді еш, тұзыңызды сор қылды”. Балғынбек Имаш Тоқаевқа үндеу жасады

Айтыскер ақын Балғынбек Имаш өзінің әлеуметтік желідегі парақшасында ел Президенті Қасым-Жомарт Тоқаевқа жазба қалдырды. Онда ақын соңғы болып жатқан даулы мәселерді тізіп, Мемлекет басшысынан арандатушыларды тоқтатуды сұраған, деп хабарлайды Uaqyt.info.

Айтыскер ақын жазбасын Президентке алғыс айтудан бастаған. Онда ол БҰҰ биік мінберінен Қасиетті Құранды қорғап сөз сөйлеген Тоқаевқа ырзашылығын жеткізеді.

“Құрметті, Қасымжомарт Кемелұлы!

Біріккен Ұлттар Ұйымының биік мінберінен Қасиетті Құранды қорғап сөз сөйлегеніңіз үшін Алла дәрежеңізді көтерсін! Қаншама мұсылман елдерінің Президенттері айтпаған үлкен мәселені көтеріп, Исламды, Алланың сөзі Құранды құрметтеп, Алланың дініне жәрдемші болғаныңыз үшін, Алла Сізге жәрдемші болғай!”, - дейді ақын.

Кейіннен ол Президенттен дінге соңғы уақытта шабуылдың көп жасалып жатқандығын және солардан қорғауды сұрайды.

“Біздің түбіміз - Түркі, дініміз - Ислам! Атамыз - Алаш, керегеміз - ағаш! Соңғы бір-екі жылда әлемде де, біздің өз елімізде де осы саф дінімізге толассыз шабуылдар жасалуда! Оны біз шамалайтын сыртқы күштер өздерін “Тәңіршілміз” дейтін адасушы топтың қолымен де, өздерін зайырлымыз деп санайтын діннен хабарсыз адамдардың аузымен де, Қазақстан Мұсылмандары Діни Басқармасын мойындамайтын адасушы ағымдардың амалдары арқылы да жүзеге асыруда.

Ауызы арақтан құрғамайтын айуандар да, зинақор хайуандар да, нашақор азғындар да, бәлеқор журналистер де дін туралы дәлелсіз жала, дәйексіз пікірін емін еркін айта беретін болды.

Соңғы айларда ғана аруақ мәселесінде, орамал мәселесінде де, домбыра жөнінде де, алаяқтық туралы да үлкен-үлкен дау-дамай туындап халық екіге жарылды.

Сіздің елді біріктіру мақсатында жасап жатқан еңбегіңізді еш, тұзыңызды сор қылған арандатушыларға тоқтау болса екен.

Елді екіге жару, берекені кетіру, бүтінді бөлшектеу, күштіні әлсірету, ынтымақты ыдырату, тұнықты шайқау, мемлекетке іріткі салу - не Ібілістің ісі, не жаудың әрекеті!

Елдегі мұсылман жамағатын да, қарапайым халықты да төзімді болуға шақырамын.

Мұсылмандықтың шарттарын сақтаған намазхандарға “Арабқұл” деген жаланы жабу тым негізсіз. Кеңестік кезеңнің 70 жылында тілі мен дінін ұмытып орыс боп кеткен дүмше-дүбәра қазақ миллиондап саналады, бірақ, 14 ғасырдан бері дін ұстаған себепті тілін ұмытып араб болып кеткен бір де бір қазақ жоқ!

Біз қазақпыз! Арабқұл да, орысқұл да емеспіз! Қазақтың даласында, қазақша тақиямызды басымыздан тастамай, қазақы шапанмен жүріп, саптама етік киіп, домбырада ойнап, айтысқа қатысып, белімізден шыққан барлық балаларымызды тек Ана тілінде сөйлетіп, осы елді қорғайтын сарбаз етіп тәрбиелейміз!”, - деп жазды Балғынбек Имаш.