Қайрат Сатыбалды сотта кінәсін толық мойындады

Астанада өткен сот отырысында экс-президент Нұрсұлтан Назарбаевтың немере інісі Қайрат Сатыбалды өзіне тағылған айыпты толық мойындады, деп хабарлайды Uaqyt.info.

“Адырна” хабарлауынша, Астана қаласы Қылмыстық істер жөніндегі ауданаралық сотында ірі мөлшерде қылмыстық жолмен алынған ақшаны жылыстату (Қылмыстық кодекстің 218-бабы, 3-бөлігі, 3-тармағы) бойынша айыпталған Қайрат Сатыбалдыға қатысты тағы бір қылмыстық іс бойынша басты сот отырысы өтті.

Сотта прокурор Елдар Нұрмаханов айыптау актісін оқыды. Оның айтуынша, Қайрат Сатыбалды қылмыстық жолмен заңсыз пайда тапқан.

«Қайрат Сатыбалды өз мақсатын көздеп, ақшаның қылмыстық құқықбұзушылықтан түскенін білген. Осыған қарамастан, ол «Каспи банктегі» шотын пайдаланып, 22 млн 965 мың долларды Дубай қаласынан жылжымайтын мүлік сатып алуға жұмсаған”, – деді прокурор.

Қайрат Сатыбалды сотқа онлайн қатысып, кінәсін толық мойындап, тергеумен келісім жасауға дайын екенін айтты.

“Құрметті сот, кінәмді толық мойындаймын. Дәлелдерге дауласпаймын. Конституциялық құқығым бұзылмады”, - деді ол.

Алдын ала тыңдау барысында қорғаушы тарап кінәсін мойындау және заңсыз сатып алынған активтерді қайтару туралы процестік келісім жасау туралы өтінішхат берді. Осыған байланысты сот процестік келісімді жасау мәселесін шешу үшін уақыт берді.

Сот отырысы белгісіз мерзімге шегерілді.

Айта кетейік, Қайрат Сатыбалды 2022 жылдың 26 қыркүйегінде басқа қылмыстық ісі бойынша алты жылға сотталған еді. Ал, 2024 жылдың басында Сыбайлас жемқорлыққа қарсы агенттік оған қатысты тағы бір іс әлі тергеліп жатқанын хабарлаған болатын.