«QosLike» жүргізушісі Диана Скатова жобадан кетті

Қазақстандағы танымал бағдарламалардың бірі «QosLike» жүргізушісі Диана Скатова жобамен қоштасты, деп хабарлайды Uaqyt.info.

Бұл туралы Диана Скатова өзінің әлеуметтік желідегі парақшасында хабарлады. Онда жүргізушісі жобадан кеткенін жазған.

“Дәл осы сәтте іштей жобамен қоштасқан шағым еді. Эфир бойы ішімдегі алай-дүлейді, қимастықты көрсетпеуге тырыстым, алайда ең соңында эмоциямды басқару қиынға соқты. Әрине, сонша жылдан соң қоштасу оңай болсын ба?! Арнамен, ұжыммен арадағы үлкен сыйластықты сақтай отырып осы шешім қабылданды. Жаңа маусым басталмайынша, бұл жайлы тіс жармадым. Бірнеше жылдар бұрын кіп-кішкентай қыз эфирге шықты да, жылдар бойы өсті, дамыды, елдің шексіз ықыласына бөленді, халықтың батасын алды. Кәсіби маман ретінде қалыптасып, тікелей эфирдің қыр-сырын үйреніп, камера алдында әбден төселді. Жобаның маған бергеніне мен ризамын, жоба да маған риза дегенге сенгім келеді. Себебі, мен шынымен бұл жолда жанымды салып тер төктім”, - деп жазды Диана Скатова.