Saturday, 20 April,2024

"Қылатындарыңды қылып алыңдар": Ринат Зайытов "алаяқтар" деп айыптағандардан қысым жасала бастағанын мәлімдеді

Алмас Абылай
Фото Ашық ғаламтордан

Мәжіліс депутаты, айтыскер ақын Ринат Зайытов өзіне ақпараттық, психологиялық шабуыл жасалып жатқанын мәлімдеді, деп хабарлайды Uaqyt.info.

Бұл туралы әлеуметтік парақшасында жазды. Онда соңғы екі күннен бері телефонға тыныштық болмай тұрғанын жазған.

"Кейінгі екі күнде маған қарай екпінді ақпараттық және психологиялық шабуыл басталды. Оны өзім де күткенмін. Себебі, оған етім үйренген. Мұндай шабуылдар маған 2008, 2011, 2019-ыншы жылдары да жасалған. Жасырмаймын оңай емес. Бірақ шыдауға тура келеді. Енді сіздерге бұл технология қалай жасақталатынын түсіндіруге тырысайын. Мысалы осы жолғы шабуылдың тақырыбы менің намаз оқып жүріп алаяқтық жасайтын адамдар жайлы айтқан сөзімді алға тартып, сол арқылы қоғамды маған қарсы қоймақ. Мақсаты белгілі. Біріншісі- мені қорқыту, екіншісі-менің жеке басыма қастандық жасалса, осы себептен екен дегізу. Сөз жоқ ақылды жүріс. Екеуінің біреуіне жеткенше олардың тоқтамайтынын да білемін. Тәуекел. Маңдайға жазғанын көреміз... бәріне бірдей бір ғана жауабым бар. Қадірлі ағайын, мен де өздеріңіз сияқты көп пенденің бірімін. Ешкімнен тығылып, ешкімнен қашып жүрген жоқпын. Қандай да бір айтарларыңыз болса, жауабын беруге дайынмын. Бар арманым елімнің дұрыс өмір сүргенін, отанымның гүлденгенін көру ғана. Ешбір топтың алдында тізерлеп кешірім сұрамаймын! Өйткені оған себеп көріп тұрған жоқпын. Әлеуметтік желі шулады екен деп, дірілдейтін қорқақтарың мен емес. Алға қойған нақты мақсатыммен жоспарым бар. Сол жұмыстарды бітіруім керек. Мәжіліс мінберінен халыққа берген антым бар. Берілген мерзім бес жыл. Сол бес жылымды халықтың мүддесін қорғауға арнаймын. Басқасы бір жаратқанның құзырында", - дейді депутат ақын.

Сонымен қатар ол өзін қорқытпақшы болғандардан шошымайтынын да ашық айтқан.

"Ватсабыма шығып, қорқытпақшы болып жатқан батырсымақтар. Сендерден шошып жүретін жағдайым жоқ. Аптасына бес күн жұмысқа жаяу барып, жаяу келемін. Қылатындарыңды қылып алыңдар. Оққағарым да, сендер айтқан "братвам" да жоқ. Сенгенім бір Құдай", - деп қорытындылаған жазбасын.

Айта кетейік, бұған дейін Ринат Зайытов БАҚ-қа берген сұхбатында хиджаб мәселесін, дін жайы мен алаяқтықты байланыстырып әңгіме айтқан еді.

 
 
 
 
 
 
 
 
 
 
 
 
 
 
 

A post shared by UAQYT.INFO (@uaqyt.info)

Ұсынылатын