Саунадан балалар лагерін ашқан кәсіпкер мемлекеттен миллиондап ақша алған
Фото Ашық дереккөзден
Ұзынағаш ауылындағы «Арман дала» лагеріне қатысты депутаттар пікір білдірді. Алматы қалалық мәслихат депутаты Нұргүл Таудың айтуынша, «БелРичи» ЖШС мемлекеттен 107 миллион теңге алған, деп хабарлайды Uaqyt.info.
Бұл туралы депутат өзінің әлеуметтік желідегі парақшасында жазды.
“Ұзынағаш ауылындағы «Арман дала» лагеріне Respublica партиясы атынан Алматы қалалық мәслихат депутаттары Қайрат Бегалин және Жалынбек Жайнарбаймен бірге барып, жағдайымен таныстым. Жазғы лагерьде баланың демалуына жағдай жасалмаған, өрескел бұзушылықтар орын алғандығына куә болдым. Лагерь ыңғайластырылған бұрынғы сауна ғимаратында орналасқан.
Қызмет көрсетуші «БелРичи» ЖШС. Мемлекеттік сатып алу шартына сәйкес қызмет көрсету құны 107,8 млн. теңге. Жоспар бойынша 1150 бала демалыспен қамтылуы тиіс.
Мемлекеттік сатып алу процедулары қалай жүргізілгендігі төңірегінде мәселе туындауына байланысты менің тарапымнан ҚР Бас прокуратурасына, Сыбайлас жемқорлыққа қарсы іс-қимыл агенттігіне, Қаржы министрлігінің Ішкі мемлекеттік аудит комитетіне тексеру жүргізу жөнінде сауал жолданды.
Оқу-ағарту министрлігінің ақпараты бойынша жақын арада балалар басқа демалыс лагерлеріне жіберіледі. Бұл мәселені өз бақылауыма алдым”, - деді депутат.
Ұсынылатын
