Шымкентте туған баласын пышақтап өлтірген әке жазадан құтылды

Шымкентте өз ұлын өлтірген ер адам жазадан құтылып кетті, деп хабарлайды Uaqyt.info Stan.kz ақпарат агенттігіне сілтеме жасап.

Сотқа дейінгі тергеп-тексеру барысында ер адамның қылмысты ес-түссіз күйде жасағаны анықталды. Сот құқық бұзушыны психиатриялық диспансерге мәжбүрлеп емдеуге жіберді.

Іс материалдарына сәйкес, қайғылы оқиға "Нұрсәт" шағын ауданындағы көпқабатты үйлердің бірінде болған. Пәтерде әке мен бала арасында жанжал шыққан. Жанжал пышақтасумен аяқталып, сотталушы 28 жастағы ұлына бірнеше рет пышақ сұғып, кейін тамағын кесіп тастаған. Жәбірленуші оқиға орнында көз жұмған.

Тергеу барысында ер адамның есі дұрыс емес екені белгілі болды. Прокурор айыпталушыны қылмыстық жауапкершіліктен босатуды сұрады.

"Соттың қорытындысы куәлардың айғақтарымен, заттай дәлелдемелермен және сот сараптамасының қорытындыларымен расталады. Прокурор А.Шаймурзаевты “тыйым салынған әрекетті есі дұрыс емес жағдайда жасағаны үшін” қылмыстық жауапкершіліктен босатуды және оған емдеу түріндегі медициналық сипаттағы мәжбүрлеу шараларын тағайындауды сұрады. Жәбірленушілер мен қорғаушы тарап прокурордың пікірімен келісті", – делінген сот хабарламасында.