Ұлттық ұлан сарбазы өзін басынан атып өлтірді: ІІМ бұл жағдайға түсініктеме берді

Ішкі істер министрлігі Ұлттық ұлан әскери қызметшісінің қазасына байланысты мәлімдеме жасады, деп хабарлайды Uaqyt.info.

Polisia.kz дерегіне сүйенсек, қайғылы оқиға 9 қазан күні, түнгі сағат 01:00-де Ұлттық ұланның 6636 әскери бөлімінде болған. Мерзімді әскери қызметші, қатардағы сарбаз Қайсар Сұлтанов кезекшілік кезінде бекітілген штаттық қарудан өзінің басына жарақат салып, салдарынан қаза болды.

"Осы факті бойынша Орталық өңірлік әскери-тергеу басқармасы өзін-өзі өлтіруге дейін жеткізу фактісі бойынша сотқа дейінгі тергеп-тексеруді бастады. Тергеу тәжірибелі қызметкерлерден құрылған жедел-тергеу тобына тапсырылды. Қазіргі уақытта оқиға орны қаралып, сот-медициналық сараптама тағайындалды. Айғақтар, атап айтқанда қаза тапқан әскери қызметшінің ұялы телефоны мен бейнебақылау камераларының жазбалары алынды. Тергеу барысында қатардағы Сұлтановтың оқиға орнында жалғыз болғаны анықталды. Оқиғаның барлық мән-жайын анықтау және тергеудің жан-жақтылығын қамтамасыз ету үшін Сұлтановтың әскери әріптестерінен, оның командирлерінен, басқа да адамдардан жауап алу, сондай-ақ тиісті кешенді сараптамалық зерттеу шаралары жүргізіліп жатыр. Жәбірленуші тараптың уәждері де толық тексеріледі. Тергеудің алдын ала нәтижелері бойынша оқиғаға құқықтық баға беріледі. Тергеу барысы ерекше бақылауда", – деді ҚР ІІМ әскери-тергеу департаментінің бастығы Серікбай Құсайынов.

Өзге ақпарат Қылмыстық-процестік кодекстің 201-бабына сәйкес жария етілмеді.